Tangaza nasi

October 15, 2019

NYOTA SIMBA, MOLINGA ATAIBEBA YANGA


Mambo ni moto ndani ya Yanga. Hivyo ndivyo unavyoweza kusema baada ya benchi la ufundi la timu hivi sasa kuwa katika harakati kabambe za kuhakikisha wachezaji wake wanakuwa fiti tayari kwa mechi ya Kombe la Shirikisho Afrika, dhidi ya Pyramids ya Misri.

Hata hivyo, wakati maandalizi hayo yakiendelea, kiungo mshambuliaji wa zamani wa Simba, Uhuru Selemani ambaye sasa anakipiga katika timu ya soka ya DC Motema Pembe ya DR Congo, ameitabiria makubwa Yanga katika mchezo huo utakaochezwa Oktoba 27, mwaka huu katika Uwanja wa CCM Kirumba jijini Mwanza.

Uhuru ameliambia Championi Jumatatu kuwa kitendo cha mshambuji wa timu hiyo raia wa DR Congo, David Molinga ‘Falcao’ kupata kibali kitakachomruhusu kucheza mechi hiyo, ni moja ya chanzo kikubwa kwa Yanga kufanya vizuri dhidi ya Waarabu hao wa Misri.

Alisema Molinga ni bonge la mshambuliaji ambaye nchini DR Congo jina lake ni kubwa na wachezaji wengi nchini humo wanaamini kuwa ataisaidia Yanga kufanya vizuri katika mechi hiyo lakini pia Ligi Kuu Bara.

“Baada ya mimi kutua DC Motema Pembe kila mchezaji alikuwa akimzungumzia Molinga ambaye huko anajulikana kwa jina na Falcao.

“Wanasema kuwa ni bonge la mshambuliaji, anajua sana kufunga, sema tu kabla ya kuja Yanga alikaa nje ya uwanja kwa zaidi ya miezi sita bila kucheza kutokana na kuwa majeruhi. Kwa hiyo Yanga wampatie muda tu kwani kutokana na jinsi wanavyomzungumzia huko DR Congo naamini atawasaidia hata katika mchezo dhidi ya Pyramids anaweza kufanya vizuri kutokana na kuwa na uzoefu na mechi za kimataifa,” alisema Uhuru.

Katika hatua nyingine rekodi zinaonyesha kuwa tangu Molinga atue Yanga akitokea DR Congo, amefanikiwa kufunga mabao manne mpaka sasa kwenye mechi zote alizocheza zikiwemo za kirafiki.

Mabao mawili amefunga kwenye mechi za kirafiki na mengine katika mechi za ligi kuu ambazo mpaka sasa Yanga imeshacheza.

Rekodi hizo pia zinaonyesha kuwa Molinga ndiye mshambuliaji pekee wa Yanga aliyezifumania nyavu katika michuano ya ligi kuu na ndiye mchezaji aliyefunga mabao mengi.

CHANZO: CHAMPIONI


AJIBU APEWA MUDA SIMBA


Kocha Mkuu wa Simba, Mbelgiji, Patrick Aussems, ana imani kubwa na kiungo wake mshambuliaji, Ibrahim Ajibu baada ya kurejea kikosini hivi karibuni akitokea kwenye majeraha.

Kauli hiyo aliitoa mara baada ya mchezo wa kirafiki dhidi ya Bandari FC ya nchini Kenya uliopigwa Jumamosi iliyopita kwenye Uwanja wa Taifa jijini Dar es Salaam uliomalizika kwa Simba kushinda bao 1-0 lililofungwa na kiungo huyo fundi.

Ajibu hadi hivi sasa amecheza michezo miwili ya Ligi Kuu Bara kati ya minne huku akitengeneza nafasi moja pekee ya bao lililofungwa na Mnyarwanda, Meddie Kagere.

Aussems alisema kuwa kiungo huyo ameshindwa kuonyesha uwezo wake kwenye michezo miwili ya ligi kutokana na kutokuwa na ‘pre season’ nzuri kwake baada ya kupata majeraha.

Aussems alisema kiungo huyo tayari ameanza kurejesha fitinesi yake huku akiamini kwenye michezo ijayo atazidi kuonyesha kiwango kikubwa zaidi ya alichokionyesha walipocheza michezo ya ligi na Kagera Sugar, Biashara FC na huo wa Bandari.

“Maswali napokea kuhusiana na kiwango cha Ajibu, labda niwaambie ni kati ya viungo bora wenye uwezo wa kuchezesha timu na kubadili matokeo ndani ya dakika 90.

“Kikubwa Kilichosababisha ashindwe kuonyesha ubora wake ni majeraha yaliyomuwekea nje ya uwanja kwa muda mrefu na kusababisha kutokuwa na ‘pre season’ nzuri kwake.

“Na hiyo ilisababisha kukosa michezo miwili ya awali ya ligi, hivyo ninaamini kadiri atakavyokuwa anacheza mechi za ligi, basi atazidi kubadilika na kuonyesha kiwango kikubwa,” alisema Aussems.


REKODI HIZI ZA MISIMU 10 NDANI YA BONGO ZIMEVUJWA NA HUYU


BALAA LA SIMBA YA MBELGIJI IMEJIFICHA HAPA, MAMBO 10 YATAJWA


MATAWI YANGA, SIMBA NI NYENZO MUHIMU ZILIZOSAHAULIKA NA WATAWALA…





NA SALEH ALLY
WAKATI nimeanza kuandika habari za michezo katikati ya miaka ya 1990, kila kizuri ambacho ulitaka kukiandika kuhusiana na michezo na hasa soka, kilikuwa migogoro.

Kulikuwa kumejaa migogoro iliyopindukia kuanzia Yanga, Simba hadi Chama cha Soka Tanzania (FAT). Mjanja ni yule aliyekuwa na uwezo mkubwa wa fitna.

Klabu na FAT ilikuwa ni mali ya watu, maana walifanya walivyotaka na hakukuwa na mwenye uwezo wa kuwaangusha, hawakushikika.

Wako walianza kuamini kuwa na nguvu hata kuliko Serikali, wakati huo ndio kulikuwa na makundi ya wanachama yenye nguvu kupita hata baadhi ya viongozi wa klabu zenyewe.

Majina ya Komandoo, yalianzia kipindi hicho. Wakati makomandoo walipigana jeshini, wako watu walijiona wanastahili majina hayo ni kama wanaharakati au wanazipigania klabu zao.

Bahati mbaya hadi FAT nako kulikuwa na makomandoo na wakati fulani “jeshi” la mwenyekiti likapambana ile mbaya na “jeshi” la katibu mkuu.

Upuuzi huu ndio ulichangia kwa kiasi kikubwa hadi baadhi ya matawi ya klabu za Simba na Yanga kujulikana kwa migogoro kutokana na kutumiwa na baadhi ya viongozi katika harakati zao za kuendeleza migogoro ili watawale wanavyotaka si inavyotakiwa.

Kweli kabisa baadhi ya makundi yalikuwa sumu kali katika suala la maendeleo ya klabu hizo kongwe. Matawi hayo yalianzisha na kuongoza migogoro, lengo kufanikisha anachotaka kiongozi fulani na kumuangamiza mwingine bila ya kujali nini kitakosekana au kitakuwa hasara kwa klabu.

Nimepita katika kizazi cha mapambano kubadili hata aina ya kuripoti, kutoka kutegemea taarifa za migogoro na badala yake kuangalia zaidi zile za uwanjani, mapato kiasi gani, nani mdhamini na mechi inachezwa vipi uwanjani, yaani utaalamu.

Hali ilivyo sasa ni tofauti na miaka hiyo tena kwa kiasi kikubwa. Nguvu ilikuwa kubwa na huenda haijawahi kuonekana lakini kupungua kwa fitna kupindukia, kumesaidia mambo mengi kubadilika na hasa angalau watu kuanza kuwaza maendeleo badala ya malumbano tu.
Wakati tumeingia kwenye mabadiliko hayo, ni miaka mingi sasa. Kumi au takribani ya hiyo inafika. Lakini wako ambao bado wana hisia yale ya zamani yapo sana.

Matawi mengi ya klabu za Yanga na Simba kwa sasa yangeweza kuwa na faida kubwa sana na kusaidia mambo mengi ya maendeleo ndani ya klabu hizo, lakini yanaogopwa.

Bila shaka, viongozi wa Yanga kwa asilimia 90 walikuwepo kwenye mpira kama viongozi au wadau katika miaka hiyo. Wanajua kilichokuwa kinatokea, huenda inachangia wao kuyaona matawi ni kama tatizo vile, hakuna anayeyatumia chanya.

Matawi yangeweza kupangiwa utaratibu mzuri kusaidia katika mambo mengi. Uuzaji wa jezi, kuitangaza klabu katika maeneo yao, kuandaa mashindano na kadhalika.

Watu wa matawi wanaweza kuwa mabalozi wazuri wa Yanga na Simba mikoani na sehemu nyingine. Wanaweza kuwa wawakilishi wazuri katika wilaya na vitongoji na wakawa wanaruhusiwa kuwa na mawazo yao huru ikiwa ni sehemu ya kuzisaidia klabu zao na wao wakaingiza chao ambacho kitawasaidia kujiendesha kama matawi.

Yanga na Simba wanapaswa kutanua wigo, kufikiri kwa upana zaidi na matawi ni sehemu nzuri kwao kuwasaidia kujipambanua zaidi na kujitanua kibiashara kwa kuanzia chini.

Hakuna anayebuni jambo kupitia matawi na hisia za kale za kuamini matawi ni hatari, bado zinaonekana kuwa na nguvu sana, jambo ambalo ni hatari sana.


Mara nyingi unachoona kilisaidia kubomoa, maana yake ni hasi. Ukiwa mbunifu unakigeuza na kuwa chanya na kinakusaidia kujenga. Yatumieni vizuri matawi yawasaidie.




KUFUZU EURO 2020, MAMBO YANAZIDI KUPAMBA MOTO, ANGALIA NDANI YA STARTIMES




Na Mwandishi Wetu
MECHI ya mwisho, England wametoka uwanjani kwa machungu wakiwa ugenini dhidi ya Jamhuri ya Czech ambao waliwatwanga kwa mabao 2-1 katika mechi ya kuwania kufuzu kucheza michuano ya Euro 2020 ambayo itakuwa na mfumo wake mpya kabisa.

Mechi hizo ambazo kwa sasa ni gumzo katika soka la Ulaya, zinaonyeshwa moja kwa moja katika king’amuzi cha StarTimes ambacho kinatumia mfumo wa HD, yaani High Definition.

StarTimes wamekuwa wakionyesha mechi hizo na kila baada ya kuwa zimechezwa kunakuwa na marudio kadhaa kuwapa nafasi wapenda soka ambao walikuwa wanaangalia mechi fulani kwenda kuangalia mechi nyingine ambazo hawakuona.

Burudani imekuwa tamu, England wao watarejea kujiuliza tena uwanjani kutokana na kilichowatokea, kipigo dhidi ya Jamhuri ya Czech ambao walifanya sherehe kubwa.

England wao wanarejea uwanjani leo, safari hii wakiwa ugenini tena dhidi ya Bulgaria, hii ni safari nyingine ngumu kwao kabla hawajarejea nyumbani Alhamisi dhidi ya Montenegro na matumaini makubwa yakiwa ni kushinda, hakuna mjadala.

Kabla ya wao hawajarudi uwanjani, wapenda mpira leo watakuwa wanaburudika na StarTimes kushuhudia mechi kadhaa za Kundi A, B na H.

Moja ya mechi ya England dhidi ya Bulgaria itatupiwa macho sana kwa kuwa wao kupoteza mechi mbili mfululizo, itakuwa ni ‘dhambi’ kubwa wadau wa soka la England na wanachotaka si sare zaidi ya ushindi.

England wanaamini timu yao ina uwezo mkubwa sana, wanataka kushinda na si jambo jingine. Lakini Bulgaria nao wasingependa kuonekana ni mchekea au ngazi huku wenzao waliweza kuwaangusha England, hivyo wangependa kufanya hivyo wakiwa nyumbani kwao pia.

Mfumo ya kuwania kufuzu kucheza Euro 2020, kidogo imekuwa na ugumu tofauti na awali. Mechi ni nyingi na zinachezwa karibukaribu, hivyo kila timu inalazimika kujiandaa sana.

Kunakuwa na mzigo mzito kwa timu kama ya England ambayo kama imepoteza mchezo mmoja ugenini, inakwenda tena kucheza ugenini, presha inakuwa maradufu.

Hii ni kwa kuwa watalazimika kuchukua presha mara mbili kwa kuwa kucheza ugenini kawaida presha inaongezeka na hasa kama timu inayopaniwa na wengi kutokana na ukubwa wa taifa hilo na historia ya soka.

Pamoja na hivyo, Kocha Mkuu wa England, Garry Southgate anaamini mambo yatakuwa mazuri na lakini anaijua pia hofu ya kupoteza mchezo mwingine wa pili, England ni presha kubwa.

Pamoja na hivyo, kikosi cha Ureno chini ya Nahodha Cristiano Ronaldo nacho kitarudi uwanjani. Hii ni baada ya mechi iliyopita ambayo walishinda kwa mabao 3-0 dhidi ya Luxembourg.

Ronaldo ameishaeleza namna anavyokiamini kikosi chake, anaona wanavyoweza kufanya kweli licha ya ugumu wa michuano hiyo.

Mfumo wa michuano hiyo kuwa mpya, kuchezwa katika nchi 12 na miji 12 tofauti kwa mwezi mzima, inaonekana ni burudani inayosubiriwa kwa hamu kubwa.

Kila upande unataka kuingia kwenye rekodi hiyo ya kucheza michuano hiyo katika miji tofauti na nchi tofauti. Hii nayo imekuwa ikiongeza presha kwa kiasi kikubwa.

Unaona, tayari kuna makocha wako katika presha kubwa akiwemo Southgate kwa kuwa kuna mataifa kawaida huonekana hayastahili kukosa michuano hiyo au mingine yoyote kama vile Kombe la Dunia.

Sweden dhidi ya Hispania kesho, ni mechi nyingine inayosubiriwa kwa hamu kubwa kama ilivyo kwa Ufaransa na Uturuki.

Licha ya kutokuwa na rekodi kubwa Ulaya, Uturuki wanajulikana kama “Taifa sumbufu” hasa wanapokutana na vigogo.

Michuano hii, wachezaji wanaotokea katika ligi mbalimbali maarufu wanakuwa wameingia katika presha tofauti. Wako wanaotegemewa lakini wanakutana na vikosi vyao ambavyo ni dhaifu tofauti na klabu zao na wanalazimika kufanya kazi ya ziada.

Bado wako wenye bahati, wanakutana na vikosi vyao vikiwa bora na wanapata nafasi ya kung’ara zaidi. Kumbuka, hatua hii ya kufuzu Euro 2020 inakuwa na “surprise” za kutosha.


LEO
KUNDI A
Bulgaria Vs England
Kosovo Vs Montenegro


KUNDI B
Ukraine Vs Ureno
Lithuania Vs Serbia


KUNDI H
Ufaransa Vs Uturuki
Iceland Vs Andorra
Moldova Vs Albania
KESHO:

 KUNDI D
Swiss Vs Jamhuri ya Ireland
Sweden Vs Hispania
Romania Vs Norway
Faroe Vs Malta

KUNDI G
Israel Vs Latvia

KUNDI J
Liechtenstein Vs Italia
Ugiriki Vs Bosnia & Herzogovina
Finland Vs Armenia








NAMNA NDOA YA SAMATTA INAWEZA KUWA FUNDISHO KWA MASTAA


Ndoa ya kepteni wa Timu ya Taifa ya Tanzania, Taifa Stars na KRC Genk ya Ubeligiji, Mbwana Samatta aliyofunga Alhamisi iliyopita na mpenzi wake wa siku nyingi; Neima Mgange, imeacha funzo kubwa kwa mastaa, Ijumaa Wikienda limedokezwa.

Baadhi ya mastaa waliozungumza na gazeti hili walionesha kushtushwa na tukio hilo na kwamba lilikuwa ni la ghafla mno.

Walisema kwanza, mbali na ndoa, lakini uhusiano wa Mbwana na Neima ulikuwa ni wa siri kubwa, tofauti na mastaa wengi hasa wa muziki na filamu Bongo ambao wakiwa na mpenzi tu huwa wanajionesha kwa kila mtu.

“Watu wengi wemekuwa na maswali kuwa aliweza vipi kumficha mpenzi wake huyo hali ya kuwa yeye ni staa wa kimataifa tofauti na mastaa wengine wa soka duniani ambao kimsingi huwa wanawaanika wachumba zao?

“Unajua sisi mastaa tumepata somo kubwa sana. Kama Mbwana angefanya ufahari kama wa baadhi ya mastaa Bongo, nakuhakikishia Dar isingepitika siku hiyo (Alhamisi iliyopita).

“Kwa jina na mkwanja wa Mbwana, angeweza hata kusimamisha mechi pale Uwanja wa Taifa (Dar), halafu akafunga ndoa yake kutokana na ustaa wake kwenye soka.

“Mimi nakwambia angekuwa msanii wa Bongo Movies, barabara zote za Dar zingefungwa kupisha msafara wake kuingia na kutoka Mlimani City. Nakuhakikishia ingekuwa balaa kubwa, lakini kwa Mbwana imekuwa simpo tu bila mbwembwe.

“Wewe fikiria ndiye Mtanzania pekee anayecheza Ligi ya Mabingwa Ulaya (UEFA), wewe unadhani angetaka kufanya mbwembwe ingekuwaje? Hawa akina Diamond wanapaswa kuiga alichokifa Mbwana na siyo kuwa kero kwa wengine.

“Naambiwa hata michango haikuwepo, kwa hiyo hakukuwa na mambo ya vikao vya harusi,” alisema mwigizaji Maurus Laurent ‘Ngubilu’.

Sherehe ya harusi ya Mbwana ilifanyika maeneo ya Kijichi-Mbagala jijini Dar na kuhudhuriwa na wachezaji wenzake wa Taifa Stars akiwemo Himid Mao na Thomas Ulimwengu.


MZUNGU SIMBA AMUANDAA MUUAJI WA AZAM FC


Kocha Mkuu wa Simba, Mbelgiji, Patrick Aussems, amesema kumuanzisha mshambuliaji wake Mbrazili, Wilker Da Silva katika mchezo wa kirafiki juzi, ni maandalizi ya nyota huyo katika kuelekea mchezo mgumu dhidi ya Azam FC.

Mbrazili huyo aliyekuwa majeruhi kwa muda mrefu, alianza na kucheza dakika zote 90 katika mchezo wa kirafiki dhidi ya Bandari ya Kenya kwenye Uwanja wa Taifa, Dar ambapo Simba ilishinda 1-0 kwa bao la Ibrahim Ajibu.

Simba na Azam zinatarajiwa kuvaana Oktoba 23, mwaka huu kwenye Uwanja wa Uhuru jijini Dar es Salaam.

Wilker huo ndiyo mchezo wake wa kwanza kuanza kwenye kikosi cha timu hiyo tangu ajiunge nayo. Mchezo wake wa kwanza ulikuwa ni dhidi ya timu ya vijana ya Azam ambao nao ulikuwa wa kirafiki lakini alitokea benchi.

Aussems alisema ana furaha kumuona mshambuliaji huyo akianza na kucheza dakika zote 90, licha ya kutofunga bao.

Aussems alisema kuwa amepanga kumpatia mechi nyingine mbili za kirafiki watakazocheza mkoani Kigoma dhidi ya Mashujaa FC na Aigle Noir ya nchini Burundi kabla ya kucheza na Azam.

Aliongeza kuwa mshambuliaji huyo ameshindwa kuonekana uwanjani kutokana na kusumbuliwa na majeraha yaliyomuweka nje ya uwanja kwa muda wa miezi mitatu kabla ya juzi kumuanzisha katika kikosi cha kwanza.

“Ninafurahi kumuona akicheza vizuri, licha ya kutofunga bao.

“Kufunga bao kwake kwangu hayakuwa malengo, zaidi nilikuwa nataka kumuongezea hali ya kujiamini, pia mechi fitinesi baada ya kurejea uwanjani akitokea kwenye majeraha yaliyomuweka nje ya uwanja kwa muda wa miezi mitatu.

“Nimepanga kumchezesha tena kwenye michezo miwili ya kirafiki tutakayocheza Kigoma, lengo ni kumuandaa kwa ajili ya mchezo wetu wa ligi dhidi ya Azam,” alisema Aussems.


BENO, MANULA WAMPASUA KICHWA MBELGIJI SIMBA


Kocha Mkuu wa Simba, Mbelgiji, Patrick Aussems, amekiri kwamba amekuwa akiumiza kichwa kuchagua nani ampange golini kati ya Aishi Manula au Beno Kakolanya.

Hilo limekuja ikiwa ni baada ya Kakolanya kujiunga na Simba msimu huu akitokea Yanga na kuanza kuonyesha makali yake na kumpa changamoto Manula ambapo awali aliikosa.

Katika mchezo wa juzi wa kirafiki dhidi ya Bandari ya Kenya uliopigwa kwenye Uwanja wa Taifa, Dar, kipa huyo alifanikiwa kuokoa michomo mingi ya hatari, hali iliyosababisha Mbelgiji huyo kukiri ubora wake umeleta changamoto kubwa kwa kipa wa zamani Aishi Manula.

Aussems alisema kuwa kwa upande wake Tanzania ina makipa bora wawili ambao wote kwa sasa wapo ndani ya timu yake, hali inayompa ugumu kuchagua wa kikosi cha kwanza kutokana na wote kuonyesha ubora mkubwa uwanjani.

“Binafsi nilishasema tangu msimu uliopita kwamba Tanzania ina makipa wawili bora ambao ni Aishi na Beno, japo Beno hatukuwa naye ila sasa tupo naye na kila mmoja ameona alichokifanya kwenye mchezo wa leo (juzi), amefanya kazi kubwa ambayo kila mmoja ameipenda.

“Aishi yeye alikuwa benchi, lakini Beno amefanya kazi kubwa kutokana na ubora alionao, ukweli linakuwa suala gumu la kuchagua nani aanze kati yao kutokana na ubora wa viwango vyao japo Aishi ni namba moja na Beno ni namba mbili lakini wote wanafanya kazi kubwa kuanzia mazoezini,” alisema Aussems.


YONDANI AWAGEUZIA KIBAO WAARABU


Beki mkongwe na tegemeo wa Yanga, Kelvin Yondani, ametoa kauli ya kibabe kuelekea mchezo wao wa awali wa hatua ya mtoano wa Kombe la Shirikisho Afrika.

Yanga imepangwa kucheza na Pyramids FC ya nchini Misri katika michuano hiyo mikubwa Afrika mara baada ya Caf kuchezesha droo na timu hiyo kujikuta ikikutana na Waarab.

Timu hizo zinatarajiwa kujitupa kwenye Uwanja wa CCM Kirumba, Mwanza Oktoba 27, mwaka huu katika mchezo unaotarajiwa kujaa upinzani mkubwa ambao Yanga wanahitaji ushindi mnono wa nyumbani.

Yondani alisema kuwa hakuna mchezaji yeyote mwenye hofu na wapinzani hao huku akiwataka mashabiki wa timu hiyo kuungana kwa pamoja katika kuisapoti timu kwa kuanzia mchezo wa nyumbani kabla ya kwenda ugenini.

Yondani alisema kuwa walitarajia kukutana na timu yoyote kabla ya droo hiyo kuchezeshwa, hivyo kwake amejiandaa kutimiza majukumu yake ya uwanjani ikiwemo kuokoa na kupunguza hatari golini kwao.

Aliongeza kuwa wamejiandaa kikamilifu kuhakikisha wanapata matokeo mazuri na hilo linawezekana kwao, licha ya kuondolewa kwenye Raundi ya Kwanza ya Ligi ya Mabingwa Afrika na Zesco United ya Zambia.

“Timu zote zilizofika hatua hii ni nzuri, tutajiandaa vizuri kuhakikisha tunapata matokeo mazuri, hatuwezi kurekebisha historia ya nyuma, lakini tunaweza kujiandaa kuweka historia mpya ya baadaye.

“Ninaamini historia hiyo itajengeka kwa kuwaondoa Waarab hao wanaopewa nafasi kubwa ya kutuondoa, hilo linawezekana kama kila mchezaji akitimiza majukumu yake.

“Safu ya ulinzi inatakiwa kulinda goli kwa kutoruhusu bao, viungo kuwachezesha washambuliaji ili wafunge mabao, kama kila mchezaji akitimiza hayo, basi hao Waarab tutawaondoa,” alisema Yondani.